Unsay Mas Makapa-ukay Nimo? Mag-bagyo ang kalibutan o mag-bagyo imong mga gipamati? (What's Worse For You? A Typhoon or Your Emotions whirling like Typhoon?)

Unya na lang nako padayunon ang pagsuwat balik hinongod sa akong kinabuhi.

Pagmata nako, medyo kusog kaayo ang ulan og hangin. Lami kaayo nga dili na mobangon og padayon na magligid-ligid sa katre. Hahahaha! Pero kung ganahan ka magpadako sa imong cuarta, bisan lami pa kaayo matulog, ganahan rapud gihapon ka momata.

Nigawas ko sa among purtahan. Nitan-aw ko sa langit og kolor gray siya. Kusog ang hangin. Lamia tan-awon sa mga kahoy og dahon nga gipalid-palid sa hangin. Kung wa mo kabantay, nahimong prisko ang hangin karon sa ciudad kay gipalid sa bagyo ang pollution. Niginhawa jud kog daghan na ginhawa para masulod sa akong lungs ang hangin na limpio. Kay adto ra intawn ta sa bukid or sa probinsya maka-ginhawa og prisco na hangin. Salamat kaayo Lord.

So sugdan na nato atong topic ron. Unsa man ang mas makapa-ukay nimo? Mas ma-ukay ba ka kung mag-bagyo or kung murag mag-bagyo imong mga gipamati?

Kung ako ang papilion, mas ma-ukay jud ko kung ang akong mga gipamati ang murag ga-bagyo. Kay kung "feelings" lang jud ang istoryahan, mura na siyag force of nature nga lisod pugngan. Kung pugngan nimo pugos, mogawas jud gihapon na siya. Mura na siyag utot. Bisan unsaon nimog pugong, masimhutan gihapon na. Hilabi na kung magsagol imong gibati. Imagina kung magsagol imong gibati nga himaya og kalibanga. Paita. Hahahahahaha! Mas lisod pa na siya kaysa sa signal number 3 nga bagyo.

So kamo mga kaigsuonan ko, unsa man inyong masulti? Ganahan ko makahibaw og mamimaw. Share mo diri as comments or kung unsa inyong feel.

Kinsa Man Kini Si Tarsiana? (Who is Tarsiana?) PART 2

Sa Part 1 nag-istorya kita kung ngano gitawag ko og Tarsiana. Naka-istorya pud ko gamay sa akong una nga trabaho. Karon, mopadayon kog istorya bisan ganahan ka or dili.

Sa katong gi-interview pa ko sa Human Resource personnel sa pinka-una nga kompanya nga nidawat nako sa trabaho, gipangutana ko niya kung unsay gidugayon sa akong plano nga mo-stay sa kompanya. Nitubag ko niya nga plano nako mo-trabaho para nila mga kapin usa ka tuig. Og gitinood jud nako intawn! Hahahahahaha! 

Nagdugay ko nila sulod sa usa ka tuig og upat ka buwan. Naka-desidir ko na mo-resign kay daghan naman kog nakat-unan nga life experiences, daghan nakog nahimo nga mga amigo og amiga, og daghan napud kog cuarta nga natigum. Pero ang pinaka-rason ngano ni-resign ko kay gi-alingogngugan nako sa akong Mama nga sige og padungog-dungog nako na dapat daw nako i-practice ang akong gi-eskwelahan pag-College. Hehehehehehe! Hala sige! Kung unsa imong pagbuot, akong tumanon! Mura nakog genie ani hinoon!

Before ko ni-resign, ni-pass ko og application letter sa usa ka sikat nga ospital diri sa ciudad sa Sugbo. Human sa tulo ka bulan, ni-resign na jud ko sa akong pinaka-una nga trabaho. Confident kaayo ko nga madawat ko sa ospital nga akong gi-applyan. Wala jud ko ni-pass og application letter sa ubang ospital. Laing terminology ani sa English kay FAITH. Bisan kato volunteer pa ko sa ospital nga ako gi-applyan sauna, na-FEEL najud nako nga mahimo ko na staff nars nila sa umaabot na future. 

Pero dili lalim ang akong paghuwat oi, kay naghuwat kog usa ka tuig kapin! Hahahahaha! In-ana ko ka-confident nga madawat ko atong ospitala! Samtang gahulat ko, galingaw-lingaw kog maayo. Unsa pa man diay akong dapat buhaton? Bakasyon engrande jud ko! Larga ko ngadto-diri sa Bohol. Pero napul-an pud ko binakasyon oi. 

Ni-desidir ko na mag-review kay ganahan ko mo-exam sa NCLEX para maka-trabaho ko as nars sa Estados Unidos. Ni-review jud ko sa Kaplan og nipalit sa tanang libro na akong kailangan basahon. Sa paghuman sa akong review sa Kaplan, nag-self review napud ko sa Bohol kay hilom man og peaceful ang lugar ni Auntie. Pero usa ka adlaw, kalit naay nitawag nako sa akong cellphone. Usa siya ka unregistered number. Kuyawan ko motubag pero feel nako nga kailangan jud nako tubagon.

Tag-ana kinsa ang nitawag nako. Tagaan taka og clue.

Mosulti na lang ko oi. Hehehehehehe! Nitawag nako ang personnel sa ospital nga akong gi-apply-yan og trabaho. Giingnan ko sa babayeng himaya nga moadto ko sa ospital inig ka buntag sa sunod ugma kay kung dili, ihatag nila ang slot sa laing tawo. 

Hala ka diha! Aware siya nga naa ko sa Bohol kay ako siya gisultihan pero iya gihapon ko giingnan nga kung dili ko moadto inig ka buntag, dili nako madawat. Ang babayeng himaya gyud! Gipasapot ko to the nth power. Hahahahaha! Pero napugos gyud intawn ko na mouli sa Cebu. Nanawag ang babayeng himaya pag alas cuatro sa hapon. Ni-settle down kog usa ka oras before ko nilakaw og nagsaguyod sa akong daghan og bug-at na bagahe. Nagabhian intawn kog pinangita og ticket sa barko. Gikan ko sa Tagbilaran pero naabot intawn ko sa Tubigon para lang mouli. Ang babayeng himaya jud. Puno sa himaya. Hahahahahahaha!

Para mahimong gamay akong istoryang taas, naabot ko sa ciudad sa Sugbo pagka-kadlawon tapos nag-nap ko og kadali tapos niadto ko sa ospital nga nidawat nako as nars. Gi-orient mi sa among mga buluhaton og uban pa.

Og diha nagsugod akong kinabuhi as nars sa ospital. Puno kaayo siya og mga kalisdanan pero ang naghatag nako kusog para magdugay sa ospital og duha ka tuig og pito ka buwan kay ang Ginoo nga akong gisaligan, ang mga amigo og amiga nako sa ospital nga dili plastic, og ang mga looy kaayo na pasyente og mga pamilya nila. Kung looy akong kahimtang sa ospital, pirti kalooy pa ang kahimtang sa mga pasyente. Sige lang, hapit napud ko mobalik sa nars pero dili sa ospital. Mag-volunteer ko sa Red Cross sa dool na umaabot.

Ganahan kaayo ko mosilbi sa akong isig ka tawo nga walay bayad nga madawat. Mao na ang lesson nga ako nakat-unan while nagtrabaho ko sa ospital.

101% akong gihatag nga effort para mahimo kong maayo sa trabaho pero birahon ra ta paubos sa mga tawong himaya. Makapungot sila pag-ayo pero nakat-on gyud ko og dako. Nakat-on ko na wala gyud sense kung modaog-daog ta sa atong isig ka tawo. 

Feeling nako bampira ko. Hahahaha! Pero mura kog walrus tan-awon diri. Okay rapud kay naa man kanta ang The Beatles nga title kay "I'm The Walrus." So bampira ko nga gipaak og walrus.

ENGLISH TRANSLATION TO FOLLOW SOON

Kinsa Man Kini Si Tarsiana? (Who is Tarsiana?) PART 1

Basin kamo nahibulong kung kinsa ko, kung kinsa si Tarsiana, ang bida sa kini nga blog. Ayaw namo kahibulong pa. 

Ang akong tinood nga pangalan kay Channel Marie Imperial. Ako gipaka-tawo diri sa ciudad sa Sugbo og diri gihapon ko nagpuyo hangtod karon. 

Baynte siete anyos nako karon pero dili mailhan sa nawong. Usa ako nga weird na tawo pero dili obvious hinoon. 

Daghan kog angga or palayaw. Lain-laing lugar kay lahi-lahi pud ang tawag nila nako. Kung unsay feel nila, mao na ila itawag nako. Ang angga nga Tarsiana kanako gasugod katong pirmi ko sa Bohol magbakasyon. Tawagon ko nila Auntie, Uncle, og mga ig-agaw nako nga Tarsiana kay feel lang nila. Si Uncle Orr ang pinaka-una nga nitawag nako og Tarsiana. Si Tarsiana kay ang lola sa akong ig-agaw na si Kuya Boogie. Dako man sad kog mata katong bata pako. Murag tarsier ba! Mao bagay ra pud nga Tarsiana ilang tawag nako.

Speaking of dako nga mata, modako jud akong mata basta picturan ko sauna. Kahinumdom pa ba mo sa mga karaan nga camera sauna sa mga photo studio? Katong mga dagko pa kaayo tapos motago sa itom nga cloth ang mga maniniyot basta mo-picture na sila?  Akong una nga experience adto kay hadlok. Nahadlok kay medyo ngitngit ang studio tapos feeling nako mura kog suyupon sa camera. Mura man gud naay tao nga mokuha nako padulong sa laing dimensyon. Mao modako akong mata nga murag flashlight. Nagkatawa ko karon samtang gasulat ko ani kay nakahinumdom pako ani nga experience.

Sa akong mahinumduman, English jud akong sinultian sauna sukad bata pako. Tungod siguro mao ni ang una gitudlo sa akong Papa kanako og tungod pirmi ko maminaw sa akong Lolo nga magbasa og National Geographic. In fairness, dili daw ko kasabot sauna kung binisay-an ko. Hahahahahaha! Kuyaw!

Murag nakat-on nako mag-binisaya katong padulong nako mag-Kindergarten. Naa naman koy mga kadula og games og duwaan ato nga panahuna so eventually, bisayang gamay na jud ko officially.

Daghan kog mga hilig katong bata pa ko. Ganahan jud ko magdula nga ako ra usa. Ganahan ko magdrawing-drawing. Ganahan ko magsulat-sulat. In fairness, na-awardan intawn kog Best In Writing kay nindot akong sinuwatan katong ni-graduate ko sa Kindergarten. Ganahan ko molaag. Usahay, mapungot gani sila Mama og Papa pinangita nako kay pirti nakong laagana jud. 

Tungod kay baynte siete anyos naman ko karon, nahuman nakog eskwela sa kolehiyo. Ni-graduate ko sa kurso nga Batsilyer of Science in Narsing sa usa sa mga nag-unang tulunghaan diri sa ciudad sa Sugbo sa Banilad Campus.

Pero dili nars ang una nakong trabaho. Ako kay nadawat sa usa ka sikat nga kompanya sa call center sauna as call center agent. Akong trabaho kay mamaligya og linya sa telepono nga mogamit og internet (laing pangalan ani sa English kay Voice Over The Internet Protocol). 

Proud ko nga mosulti nga usa ko sa mga maayo mamaligya niadto, og usa pud ko sa mga pinaka-maintain ang ZERO nga halin hapit sulod sa usa ka semana. Hahahahahahaha! Nagkosumisyon intawn akong pinilangga nga mga Team Leaders og Shift Managers sauna. Maglabad ilang ulo tungod sa akong maintainance nga ZERO nga halin. Hehehehehe! Ako pud, maghilak sa dili pa magsugod ang trabaho og inig uli namo gikan sa trabaho. 

Dili jud lalim mag-trabaho sa call center, labi na kung naa mo sa sales department. Bisan lisod akong experience sa call center, dako kaayo kog kalipay og pasalamat kay nakahimo kog daghang amigo og amiga, og pirti kanindot nga life experiences akong nakuha sa katong panahon nga maayo ko mag-inenglish.

Og sa dihang pagtan-aw nako, pirti naman taasa diay sa akong nasulat. Ako lang ni padayunon sa Part 2 para....... abangan ang susunod na kabanata!

ENGLISH TRANSLATION TO FOLLOW SOON

Mao ni ang nawong ni Tarsiana kung magsagol iyang kahadlok, iyang feeling nga gilood, iyang feeling nga nahibulong, og apil na siguro ang utot nga sagulan pa jud og panuhot. Kuyaw! Fans club kaayo siya sa The Beatles. As in!